我的梓睿BB抢闸出世了！！顺便讲讲我的剖腹产经历。。

我亲爱嘅梓睿BB终于喺2014年11月26号抢闸出世喇！！比预产期足足提前咗20日，点解会咁呢？大家仲可以顺便睇下我嘅剖腹产经历，全文会好长，俾准妈妈们做个参考，有兴趣嘅可以耐心睇下。

我11月24号去医院产检，本来何医生都话我BB嘅胎头已经好低喇，而且盆骨够大实好易生！谁不知做B超果时发现羊水少、脐血流高同胎心快嘅情况，真係吓亲我！何医生即刻就要我入院补羊水，但係住咗两日院连续吊咗好多瓶针，BB嘅生物物理评分都越来越低，我攞住张报告真係心都实埋，好惊好担心BB会有事。当时係中午嘅12点左右，我家婆一早已经送咗饭嚟，喺我准备食饭果时，8楼嘅朱医生睇完报告就即刻叫我禁食，我已经知道要做手术喇，突然间觉得好紧张，我未有心理准备啊，我以为只係入院安胎几日咖！！

我即刻通知屋企人，喺惶惶不安之中一直等到6点几。本来朱医生话大概7点钟就可以同我做手术，护士就提早同我备皮、插尿管。插尿管真係好唔舒服，成日都好似急尿咁，最惨係自己连几时排咗尿都唔知。。插完尿管之后坐立不安，以为好快会去手术室啦，点知要等到差唔多9点先有人接我上去18楼。

入到手术室好冻好冻，张手术床超级窄，瞓咗上去都唔敢乱动。有助产士嚟同我打针，然后就一直等，等到9点几麻醉师先嚟同我麻醉。麻醉嘅时候会觉得酸痛，我觉得果种痛係直达尾椎骨嘅，麻醉师仲话我嘅膜好有弹性，支针插落去会弹翻上嚟，我问麻醉师係咪赞紧我？（我居然仲可以同麻醉师讲笑，其实我当时好紧张。。）好快我两只脚都无知觉喇，连转身都要助产士抬。（打完麻醉会觉得更加冻，直到翻去病房我都全身不由自主咁打冷震。）然后就见到主刀冯医生入嚟，佢一路同麻醉师倾计一路同我做手术，当时只係觉得佢喺我肚皮度一划，然后好快就叫助手按住我胃部位置，好大力。我感觉个肚一下子俾人掏空咗咁，隔咗几秒就听到BB喊声。我当时好激动啊，忍唔住喊咗。可能因为知道BB平安无事，成个人放松晒马上觉得好攰，缝针嘅时候几乎瞓着咗。到助产士叫我睇BB性别嘅时候，我好艰难咁望咗一下，係男仔！！连BB个样都无望到就抱走喇。。之后就係上病房，出手术室果时老公同我讲句：“老婆，辛苦晒，BB好得意啊！”只要BB无事我就安乐晒喇！

最惨係俾护士按肚排恶露，第一次麻醉药未过就觉得无咩事，第二、三次按真係好痛，痛到忍唔住大叫同飙眼泪，好彩当时有老公喺我身边。我连续“包房”5日，等老公可以照顾我同BB之余瞓得好D，但係我生BB呢几日就撞啱最热果几日，我翻咗病房之后成个人就未干过，不断出汗，好辛苦！之后3日我唔可以落床，直到拆咗尿管同镇痛泵，我就要落床自己去厕所，不过绑咗束腹带真好舒服好多，连行路都无咁痛！D护工都算尽心，成日嚟睇下我地两母子又帮我擦身。我从手术后一直都无奶，直到第4日先有好少好少，我已经不断饮鱼汤，又有俾BB吸，但係BB好心急，吸一阵发现无奶就大喊唔肯再吸，所以而家只能够暂时喂奶粉。。。

今日啱啱出院，望住我最亲爱嘅梓睿BB仲觉得好唔真实，我咁快就做人妈咪喇？好似仲发紧梦咁！由一开始发现怀孕、到感觉到佢胎动，再到而家见到佢识喊识叫，真係要赞叹生命係一个奇迹，亦都知道为人父母係几咁艰难！

梓睿BB，多谢你，係你教识我要更加孝顺父母，以后嘅日子仲要你多多指教啊！！

※※※※※※※※※※※※※※分※※割※※线※※※※※※※※※※※※※※※※※※

睇到呢度嘅朋友真係有耐性，连我自己觉得长气啰嗦，唔好讲咁多喇，上图先！